【on.cc东网专讯】 现年53岁嘅钱国伟（Wilson），21岁加入无綫，当时佢由办公室助理开始从低做起，之后获得无綫节目总监陈宝珠赏识，转任晨早节目及儿童节目助导，佢与艺人郑伊健正正因为合作儿童节目《430穿梭机》而识于微时，二人仲经历过一个饭盒两份食嘅坎坷日子而变得老友鬼鬼添！Wilson其后慢慢捱出头，仲升任监製，谂头多多嘅佢仲製作出唔少创新嘅综艺节目，例如《奖门人》、《美女厨房》及《味分高下》等等，由于佢监製嘅节目都大受欢迎，为佢赢得「金牌监製」嘅美誉外，其监製嘅节目《美女厨房》仲夺得「最佳综艺节目」奖项添！
出名系义气仔女嘅Wilson喺娱乐圈人缘甚佳，但2010年佢被卷入贪污案，进入事业低潮期嘅佢话当时见尽人情冷暖，幸得有郑伊健、林珊珊及曾志伟等挚友依然对他不离不弃，仲有当时同佢低调拍拖嘅女友陈宛蔚一直陪伴喺身边！Wilson喺卷入贪污案期间被无綫停职，其后虽获撤销保释，但都决定离开服务多年嘅无綫。之后转做导演嘅佢执导过唔少卖座电影如《喜爱夜蒲》系列，最近仲有份执导周星驰嘅电影《美人鱼》，认真威水！
不过要数最威水，应该系佢扮Psy扮到出晒名！韩国歌手Psy嘅歌曲《江南Style》喺2012年红遍全球，同Psy劲似样嘅Wilson联同好友郑伊健等翻拍MV大跳「骑马舞」，Wilson扮Psy扮到出神入化，其搞笑嘅演出仲令MV点击率超过三百万添！
钱国伟由红裤仔出身，慢慢捱出头，赢得「金牌监製」嘅美誉。
Wilson（左三）同伊健（左二）识于微时。
Wilson同志伟一齐炮製《奖门人》，大受欢迎。
扮PSY同贾晓晨一齐拍MV。
同PSY企埋一齐，直情一样样咁滞！
