网民热话：《无双谱》郭羡妮古装冇得输！_港剧

【on.cc东网专讯】最近讲古代神话嘅无綫剧集《无双谱》热播，呢套剧出街短短几日就已经被网民热烈讨论！剧中第一亮点就系「双料视后」田蕊妮一人分饰两角，演活左孖生兄妹段凤三及段素四，又男又女，令观众都大讚佢嘅演技！呢套剧嘅故事主要分三个单元，田蕊妮同黄浩然条感情线就岩岩完左，依家紧接出场嘅就系黎耀祥同郭羡妮啦！唔少网民都相当期待呢对组合，事关「三届视帝」黎耀祥就当然有睇头啦，但系好耐冇见嘅郭羡妮更系一大卖点，唔少观众睇完都大叫：「无论过左几多年，郭羡妮嘅古装依然都系冇得输呀！」

一人分饰两角为肖为妙

选美出身嘅郭羡妮系1999年度香港小姐冠军及2000年度国际华裔小姐冠军，唔讲唔知佢仲系中英混血儿添！2011年与内地武术指导朱少杰结婚，2012年诞下女女Kylie之后已经好少喺香港电视萤幕上出现，不过原来大家都好挂住佢，特别系佢嘅古装形象真系深入民心！今次佢喺剧集《无双谱》入面一人分饰佘还珠及一品香两角，两角性格截然不同，但依然扮得为肖为妙，简直好似精神分裂咁，深受观众喜爱，仲话今年绝对有机会同阿田喺年尾力争视后！

古装界女神

更有网友特登搵番以前郭羡妮做过嘅古装角色出嚟怀念一番！当中有《覆雨翻云》的靳冰云、《洛神》的郭嬛、《争霸》的绝代美人西施及《牛郎织女》的伏织织等等！个个形象都靓到好似仙女咁！难怪网友都话：「真系个个造型都好靓又有气质，又成熟，果然系港姐冠军！」「生完bb都仲可以keep到咁fit！」网民仲话郭羡妮简直系古装界嘅女神！

网民有话儿：

MATTXXX CHXXXX：郭羡妮坚系好靓女...

KARX TX：细细个睇佢啲古装已经觉得佢好靓...

NIXX TSXXX：永远嘅女神呀...

CMCXXX AX：郭羡妮呢d咪天然萝！

KATX PAXX：佢而（依）家都40岁, 都仲好靓呀~~我都想到40个（嗰）阵keep到好似佢咁！